PM Modi leh UAE president inbia, Strait of Hormuz him zawk a siam remti

Prime minister Narendra Modi leh UAE president Sheikh Mohamed bin Zayed Al Nahyan chu Thawhlehni khan telephone kaltlanga inbiain, West Asia buaina thleng mek karah Strait of Hormuz chu zalen leh him zawka siam an remti. PM Modi leh UAE president-te hi US-Israel-in Iran a beih hnua an inbiak vawi hnihna a ni.

Inbiakna chungchang hi PM Modi chuan X-ah tarlangin, tun hnaia West Asia dinhmun chu UAE president nen an sawi dun tih leh, indona thleng meka pawisawi lo beih tel leh vantlang hmunte tihchhiat a ni chu pawi a tih tak zet thu a sawi. Modi chuan Gulf ramte'n beihna an tawh a dem thu sawiin, UAE hruaitute nen thawh ho zel an remtih thu leh West Asia huam chhunga rang taka dinhmun ṭha leh venhimna bakah remna leh muanna thlen zawnga hmalak dun zel an remtih thu a sawi.

Iran hian US-Israel beihna a chhan letnaah a ṭhenawm rama US sipai hmun hrang hrang a bei let ve nghal a ni. West Asia buaina a chhuah hnu hian PM Modi chuan heng lai huam chhung ram hrang hrang hruaitute hi a lo be tawh a, UAE bakah Saudi Arabia, Bahrain, Kuwait, Oman, Jordan, Israel, leh Iran hruaitute chu telephone hmangin a lo be pawp vek tawh a ni.