Chhattisgarh assembly-ah sakhaw inleh khapna bill pharh ve leh

Chhattisgarh sorkar chuan nimin khan state assembly ṭhutkhawmah tihluihna, inbumna, inthlemnate avanga sakhua inleh luih tir venna tur bill, Chhattisgarh Dharm Swatantraya Vidheyak, 2026 (Freedom of Religion Bill, 2026) chu deputy chief minister Vijay Sharma chuan a pharh. Member-ten an la sawi ho leh dawn a ni.

Dan thar hman tur ruahman hi rinna dang chelhtu hrang hrangte tihluihna, inbumna, inthlemna, leh thudik tawk lo hmanga sakhaw inlehtirna thleng ṭhin awmze nei zawka venna tura tih a nih thu sorkar lam chuan a tarlang. Bill hi state cabinet chuan kar hmasa khan an lo pawm tawh a, cabinet-in an pawm hnu hian Sharma chuan kaihhruaina hrang hrang kum 1968 aṭanga awmtawh siam ṭhatna leh tunlai mil thei zawk tura tihṭhat a nih thu a sawi.

Sharma chuan inbumnate chu kawng hrang hrang hmangin a thlen theih thu sawiin, digital leh sum leh pai hmangten a thlen theih thute, chumai bakah taksa inhliam zawng emaw in vauna ang pawha thleng thei a nih thu a sawi lang bawk. Dan thar duan chu mipuite diknna chanvo humhim a, an zalenna neih danpuiin a pek nghawng buai lo thei tura duan a nih thu tarlang bawk.

Dan thar hi pawm la ni lo mah se state-ah hian Chhattisgarh Dharm Swatantraya Adhiniyam (Freedom of Religion Act), 1968 hman mek a ni. He dan hman lai hi Madhya Pradesh aṭanga kum 2000-a a inlak hran hnu khan a hmang zui chhunzawm ve nghal a ni.