Gulf aṭanga India pan tur lawnglian 22-te chhuah dan tur tihfel a ni

Sorkar laipui chuan Persian Gulf huam chhunga India lawnglian tangkhang mek 22 ten Strait of Hormuz him dam taka an rawn chhuahsan theihna tura tihfel a nih thu a sawi. Lawnglian 20 hian India energy mamawhna phuhru thei turin liquefied natural gas (LNG) MT nuai 2.15, LPG MT nuai 3.12 leh crude oil MT nuai 16.76 an phur dawn a, lawngliante hi India ta leh ramdang ta niin India an rawn pan vek dawn a ni.

Persian Gulf huamchhung aṭanga lawng lian a rawn chhuah theihna tur hian Ministry of Ports, Shipping and Waterways; Directorate of Naval Operations (DNO); Ministry of Petroleum and Natural Gas (MoPNG); leh Information Fusion Centre–Indian Ocean Region (IFCIOR) te thawh hona kaltlanga hmalak a ni a, buaipui ngai leh ṭul hrang hrangte an kut ken a ni. Heng lawngte hi an chhuah hma hian India lawnglian, LPG phur pahnih leh oil tanker pakhat Shivalik, Nanda Devi leh Jag Laadki te chuan India an rawn thleng tawh bawk.

India lawnglian tangkhang mek hi 22 a ni a, Persian Gulf huam chhung, Strait of Hormuz thlang lamah tangkhangin; a dang pahnih strait chhaklam Gulf of Oman-ah an tangkhang mek a; Gulf of Eden-ah pakhat; Tuipui Senah pahnih an tangkhang a ni. Heng lawnglian tangkhang zinga paruk chu Shipping Corporation of India ta an ni. Lawng panga chu Persian Gulf-ah tangin, pakhat hi Gulf of Eden-ah a tang thung .

West Asia buai avanga lawng tangkhang eng emaw zat awm mah se, India lawngliangte erawhin beih an la tawk lo a ni. Amaherawhchu, India mi tuipuia eizawng pathum an thih tawha midang paliin hliam an tuar a, rampawn lawng a thawk chin hriat loh a awm mek bawk.