TMC-in officer sawn chungchangah ECI a khing

West Bengal-a rorellai, Trinamool Congress party chuan an state assembly inthlan neih hun tur puan a nih hnu lawka Election Commission of India-in an state-a IAS leh IPS offier eng emaw zat a sawn chungchang chu Calcutta High Court-ah a khing.

Petition hi TMC hruaitu leh lawyer, Kalyan Banerjee chuan a theh lut a ni. EC-in state sorkar rawn miah loha officer a sawn kual chhan a zawt nghal bawk. Kar lehah hearing neih a ni ang.

EC hian March 15-a West Bengal assembly inthlan neih hun tur a puan aṭanga darkar rei loteah senior official eng emaw zat a sawn nghal a, an zingah hian chief secretary, home secretary leh director general of police te pawh an tel. ECI chuan officer sawn kual an nihna chhan hi inthlan neih tur buaipuinaah dik leh felfai taka neih a nih theihna tur niin a sawi ve thung.

Bengal chief minister Mamata Banerjee chuan EC thiltih dan chu na taka sawiselin, democracy kalphung ni loin, politics lama phuba lak tumna, a ruka emergency puan ang mai leh, Bengal thunun tuma instutional dik lo taka hmangah a puh. Banerjee hian chief election commissioner, Gyanesh Kumar hnenah pawh lehkha thawnin, EC chu hleih nei taka thutlukna siam lo turin a ti. "Special Intensive Revision (SIR) kalpui a nih aṭangin EC hian hleih nei takin thil a ti a, thil nih dan dikt ak leh mipui ṭhatna turte chu engah mah a ngai lo," tiin CM chuan a ziak a ni.

Seat 294 awmna, West Bengal assembly inthlan hi thawh hniha neiha ni dawn a, April 23 leh 29 ah vote thlakin, May 4-ah result puan a ni ang.