Gulf of Oman aṭangin India LPG tanker indo lawngin escort

India lawng lian, liquefied petroleum gas (LPG) phur chuan Hormuz Strait a paltlang hnuah India a rawn pan zel a, him taka a rawn thlen theihna turin Indian Navy indo lawnglian chuan a escort a ni. India lawng lian pahnih hi Jag Vasant leh Pine Gas-te niin an inzui a, ship tracking data aṭanga a landanin Gulf of Oman-ah an awm mek a ni.

Lawng pahnihte hian LPG ton 92,612 an phur niin Ministry of ports, shipping, and Waterways-a special secretary Rajesh Kumar Sinha chuan a tarlang. Lawng pahnih hian strait an rawn paltlang hma hian Iran thuneituten phalna an pe a ni. Lawng pahnihah hian thawktu 33 leh 27 an awm mek a , March 26 leh 28 hian India lawng chawlh hmun an rawn thlen theih beisei a nih thu Ministry lam chuan an tarlang.

India pana rawn kir mek lawng pahnihte hi Persian Gulf huam chhunga India lawng 22 tangkhang zinga mite niin, a hma hian LPG ton 92,712 phur MT Shivalik leh MT Nanda Devi chuan him takin India a rawn thleng tawh bawk. West Asia buaina chhuah ṭan tirh khan India lawng lian 28-te chu Hormuz Strait-ah hian an awm.

India hian indona a chhuah hma khan crude oil 88%, natural gas 50%, leh LPG 60% chu West Asia ram aṭang hian la lut ṭhinin, crude oil chawk luh aṭanga a zatve aia tam chu Saudi Arabia, Iraq, leh UAE aṭangin Hormuz Strait paltlang hian a la lut ṭhin a ni. LPG a lak luh zinga 85-95% leh gas a lak luh 30% chu Strait paltlanga lak luh an ni.