CAA : East Delhi-ah buaina chhuak leh
Delhi-a Seelampur area-ah nimin khan Citizenship Amendment Act (CAA) duh lohna lantirtute leh police-te inkarah buaina a chhuak.
Pathianni chawhnua Jamia University a thilthleng leh CAA duh lohna lantira pungkhawmte hian police-te chu lungin an tawng a, police lam hian mipui hnawhtdarh nan tear gas an hmang bawk. Police-te chuan nimin chhun dar 12 aṭang khan duh lohna lantirtute hi an pungkhawm tih sawiin, Seelampur T-point-ah pungkhawmin CAA, National Register of Citizens (NRC) leh sorkar duh lohna thute an auchhuahpui tih an sawi. Buaina chhuakah hian police pahnih an hliam nia sawi a ni a, lirthei tihchhiatte a awm bawk a ni. Delhi Metro Rail Corporation chuan buaina chhuahna bula metro station pasarih an khar tih an sawi bawk.
Nimin khan eptu party-te chuan Citizenship Act duh lohna hi an la lantir chhunzawm zel. West Bengal-ah pawh chief minister Mamata Banerjee hoin kawng an zawh leh. Tamil Nadu-ah eptu party DMK chuan an hotu MK Stalin hoin lungawi lohna an lantir bawk a ni. Bahujan Samaj Party (BSP) hotu Mayawati chuan sorkar laipui hnenah CAA chu hnukkir turin a ngen.
SC-in High Court pan hmasa turin a ti
Nimin vek khan Jamia Millia Islamia and Aligarh Muslim University-a CAA duh lohna lantira zirlai nawrh huaihawtte chunga police-te chet dan chungchangah Supreme Court chuan hearing neiin, high court pan hmasa turin a ti.
Chief Justice of India S A Bobde kaihhruai bench chuan," Thil dik awmsa hrereng chunga hun khawhral kan duh lo a, court hniam zawkah kal hmasak phawt tur," a ti. Hei vang hian CAA duh lohna lantirnaa buaina chhuak hrang hrang chungchang ngaihtuahtu, Supreme Court judge hlui kaihhruai committee din tura ngenna chu hnawlin, heng panel chu high court lamin a din tur tur zawk a nih thu a sawi.
Miin pawi a khawih a nih phawt chuan police-te chuan mi man tura zalenna an neih theih thu sawiin, zirlai hliamte chu enkawl an nih tur thu bench chuan sawi bawk. CJI Bobde chuan sorkar laipui hnenah duh lohna lantirtute hnena hriattirna pe hmasa loa man an nih chhan sawifiah turin a ti a, damdawi hmanga enkawl an ni em tih sawi turin a ti bawk a ni.