NIMHANS-in National Mental Health Survey 2025-26 kalpui dawn

India rama hriselna lama mi thiam rual awmna, National Institute of Mental Health and Neuro Sciences (NIMHANS) chuan kumin leh kum thar chhung hian ram pum huapin 'National Mental Health Survey (NMHS) 2025-26' a kalpui dawn tih an puang. Zirchiannaah hian a vawi khatna atân rilru lam hrisel lohna (mental illness) chauh thlir loin, rilru hriselna vawn dan (mental wellness) zawk thupui berah hman a ni dawn a ni.

Union Ministry of Health and Family Welfare hriatpuina hnuaiah he survey hi kalpui tur a ni a; hna thawh turah hian NIMHANS chu mawhphurhna pek an ni. India ram pum huapa rilru hrisel lohna dinhmun te, damdawi-in an pan dan phung te, leh hriselna lama thawktu leh hmanrua kan neih dante a zir chiang dawn a ni.

NIMHANS-a Prof. Girish chuan thuthar lakhawmtute hnenah, "Tun ṭum chu rilru hrisel tawk lohna lam chauh thlir loin, rilru hrisel tak kan nih dan (well-being index) kan endik dawn a ni. Hei hi thil harsa deuh tur ni mah se, mipuiin an hriselna an enkawl dan leh an hriat dan tarlan kan tum a ni," a ti. He survey-ah hian kum upa lamte khawharna leh hmeichhiatna lama harsatna hrang hrang (pre-menstrual leh post-menopause) ten rilru hriselna a khawih dan te pawh telh a ni ang.

Kum 2015-16 khan NMHS-1 kalpui a lo ni tawh a, mahse, khatih lai khan state 12 chauh an tel a ni. Tun ṭumah erawh chuan India rama state 28 leh Union Territory 8-te an tel vek tawh dawn a; tun thleng hian state 24-ah mi 2,50,000 chuang an kawm tawh. Zirchianna tlangpui (draft report) hi July 2026-ah National Technical Advisory Group hnenah thehluh a ni ang a, final report erawh October 10, 2026 (World Mental Health Day)-ah tlangzarh a ni ang.