Bihar CM hna chelh rei ber Nitish Kumar bang

Bihar chief minister Nitish Kumar chuan nimin khan State Legislative Council (MLC) aṭanga a banna a thehlut. Banna hi Rajya Sabha member atana thlan a nih tak avanga thehlut a ni a, Bihar Legislative Council chairman Awadhesh Narayan Singh chuan a lo pawmpui nghal a ni.

Legislative council chairman chuan Kumar-a banna hi a pawm thu sawiin, "Nitish Kumar-a banna hi kan pawm a, dan leh hrai anga bawhzui a nih hnuah he seat hi a ruak tih puan chhuah a ni ang," a ti. Chairman hian Nitish Kumar-a’n Bihar hmasawnna atana a thawhhlawkzia sawiin, a ui takzet thu a sawi lang bawk.

Nitish Kumar hi kum 2006 aṭang khan Bihar Legislative council-ah hian a lo ṭhu tawh a, nikum May thla khan term lina atan thlan nawn a ni. Chief Minister bakah state BJP president Nitin Nabin pawh RS MP-a thlan a nih ve tak avangin Bankipur MLA a nihna atangin a bang ve nghal bawk a, an pahnih hian March 16 khan parliament upper house a seat ruak hnawh khat turin thlan tlin an ni.