PM-i'n vaccination progamme a hawng dawn Ni khat niah mi nuai thum velin vaccine la dawn

Union health ministry chuan naktuk, January 16 hian India rama Covid-19 vaccine pek chhuah kal- ṭanpuina tur, vaccination programme chu prime minister Narendra Modi-a'n a hawng dawn tih nimin khan a tarlang. PM Modi hian video link hmanga programme a hawn rual hian, vaccine dawng tur healthcare worker ṭhenkhat chu a kawm nghal dawn a ni. 

Vaccine pek ṭan ni vek hian PM chuan Covid-19 vaccine pekchhuah leh sem dan enfiahna tura digital platform siam,  Co-WIN (COVID Vaccine Intelligence Network) App chu a tlangzarh nghal dawn nia sawi a ni bawk. Centre khatah hian ni khatah session khat zel neiin, hemi chhung hian mi 100 hnenah vaccine hi pek an ni ang. 

Official-te chuan a ni khatnaah hian ram chhunga hmun 2,934 aṭangin vaccine hi pek a ni dawn a, healthcare worker nuai thum velin an dawng dawn tih an sawi. Centre hrang hranga vaccine pek hmasak tur healthcare worker tihte hi doctor leh nurse te chauh an ni lo a, damdawi lama thawktu hrang hrang, ambulance driver-te thlengin a huam dawn a ni.

Sorkar laipui chuan state hrang hranga vaccine sem chhuahnaah duhsak bik leh inthliarna engmah a awm loh thu a sawi. Union health ministry chuan ram chhung hman tura pawm tawh, Covishield leh Covaxin chu state hrang hrang  hnenah healthcare worker awm zat data behchhanin sem chhuah a ni tih a sawi. Maharashtra health minister Rajesh Tope-a'n state chhunga healthcare worker awm zat nuai 17.5-te data an thehlut chungin vaccine hi dose nuai 9.83 chauh an dawng tih a sawi avangin sorkar laipui chuan a rawn chhang a ni. Vaccine thawn chhuah hi state hrang hranga a thawh khatna chauh kalpui a la ni a, thawn chhuah chhunzawm zel a nih tur thu a tarlang. 

A thawh khatna atan sorkar laipui chuan Covishield dose vaibelchhe 1.1 leh Covaxin dose nuai 55 a lei a, hei hi state hrang hrangah a sem chhuak a ni.