AAP-in RS-a party deputy leader Raghav Chadha thlak

Aam Aadmi Party (AAP) chuan Ningani khan Rajya Sabha-a an party deputy leader Raghav Chadha an thlak a, a aiah Punjab MP Arvind Kejriwal an dah. Chadha hi an party-a thutlukna siamtu sang ber, member 12 awmna political affairs member erawh a la ni chhunzawm tho a ni.

AAP chuan Raghav Chadha thlak a nih chungchangah an tihdan phung pangngai niin a sawi a, mahse, tun hnaiah Chadha leh AAP hotu ber, Arvind Kejriwal inkar boruak a ṭha vak lo nia sawi a nih vangin party chhungah inmil lohna a awm nia sawi zui a tam hle. Kum 2023 Lok Sabha inthlan hnua Delhi excise policy case-ah Kejrieal man a nih leh khan, party-in lungawi lohna an lantirnaah Chadha hi a tel loh bakah thawm engmah a nei lo a, a hnuah London-ah a mit zaiin a kal tih a sawi. Mahse, hemi hnu hian Kejriwal nen hian an inhlat sawt hle nia sawi a ni. Kumin February thlaa Delhi court-in Kejriwal leh party hruaitu dangte an chhuah ṭum pawh khan Chadha hian thuchhuah engmah a nei lo bawk. March thlaa eptu MP 193-ten chief election commissioner Gyanesh Kumar ban phutna lehkhaa hming an sign ṭum khan Chadha hian a hming a sign ve lo bawk.

Rajya Sabha-a AAP deputy leader atana ruat thar, Arvind Kejriwal hi Punjab-a Lovely Professional University (LPU) founder Chancellor a ni a, kum 2022 khan Rajya SAbha member atan thlan tlin a ni. Parliamentary committee hrang hrangah a tel tawh a, tunah hian Committee on Defence leh India-USA Parliamentary Friendship Group-ah member a ni mek a ni.