Strait of Hormuz chungchanga UK summit neihah India tel

Khawvel huapa energy hnar pawimawh tak, Strait of Hormuz chu Iran-in US leh a thurualpui ramte tana a dan chah avangin, he tui kawng pawimawh tak hawn leh dan kawng zawnna atana UK-in summit a buatsaihah India a tel.

India aiawhin foreign secretary Vikram Misri chu video conferencing hmangin he inrawnkhawmnaah hian a tel. Misri hian khawvel huapa lawng lian hrang hrangte zinkawng pawimawh tak himna tur hian India a din tlat thu a sawi. Summit neihah hian ram 40 chuang an tel a, West Asia buaina hian khawvel puma energy supply a tihkhaihlak reng lohna tura hmalak chhunzawm an tum thu an tarlang.

Summit thupui, ram hrang hranga commercial lawng liante Hormuz Strait huam chhunga zalen zawka an kal theihna tur 'Free and Open' policy chu India chuan a thlawp thu a sawi. India chuan LPG leh LNG a mamawh phuhruk tur hian Hormuz Strait kaltlangin Middle East ram aṭangin a chawk lut ṭhin a ni. Iran-in a ṭhianṭha ram nia a chhalte Strait kaltlang phalna a pek zingah India pawh telin, tun hnaiah India pan tur lawng paruk chuan he tui kawng hi him takin an lo paltlang tawh a ni.