Chidambaram-a'n Lok Sabha seat tihpun a thlawp lo

Congress party hruaitu, union finance minister hlui P Chidambaram chuan BJP kaihhruai sorkar laipuiin Parliament lower house, Lok Sabha seat 816-a tihpun a rawtna chu a thlawp lo tih nimin khan a sawi. Hei bakah assembly inthlan neihna turte a awm mek laia April 16-18 a hmeichhe quota chungchang hman dan ngaihtuaha Parliament ṭhutkhawm koh chu a hun lo a tih thu a sawi bawk.

April 23 hian Tamil Nadu assembly inthlan neih a ni dawn a, West Bengal-ah pawh April 23-ah assembly inthlan thawh khatna leh, April 29-ah thawh hnihna neih a ni ang.

Chidambaram chuan Tamil Nadu MP 39 leh West Bengal MP 28-te chu Lok Sabha-ah Opposition bench-a ṭhu an nih thu a sawi. Sorkar laipuiin ṭhutkhawm a koh hunlai hi an state inthlan neih tur avanga an campaign ṭul hun lai tak a ni tiin hetiang thil pawimawh. bill siamṭhatna tur ngaihtuah a, sawi ho leh vote lakna tur hun ruatah hian heng MP 67 te hi an tel thei dawn lo a ni, a ti. Sorkar thiltih dan chu eptu MP te tel theih loh tura an ruahmanna ngei nia a lan thu a sawi bawk.

Bill siamṭhat tur chungchang pawh mipui hmuhah pho chhuah a ni lo a, prime minister Narendra Modi-a'n Kerala-a election rally a neihah a a sawi lan chauh a ni ,a ti. Lok Sabha seat 548 aṭanga 816-a tihpun tum chu hmasawnna ni loin, hnungtawlhna zawk tur a ni a ti. Hmeichhiate tana seat, hmun thuma ṭhena hmun khat hauhsakna tur chu tuna seat awm zat aṭang hian tih mai tur a ni, tiin a sawi.