Defence ministry-in IAF tan kg 1,000 bomb siam turin hma la

India sipai thuam chakna leh mahni intodelhna (Aatmanirbharta) kawnga hmalakna thar atan, sorkar laipui chuan India Air Force (IAF) te tan kg 1,000-a rit 'aerial bomb' India rama siam turin hma a la ṭan.

Defence Ministry-in a tarlan danin, bomb hi IAF-in tuna an hman lai mek, ram dang aṭanga an chawk luh 'Mk-84 class general-purpose bomb' anga thawk thei tur a ni a; he hmalakna atan hian 'Expression of Interest (EoI)' tihchhuah tawh niin, bomb siamtu tur te, a mei (tail units) leh a hmanraw dangte enfiah a ni dawn a ni.

Project hi 'Make-II' (industry-funded) hnuaia kalpui tur a ni a, a hnuah 'Buy (Indian–IDDM)' category-ah dah leh niin, a vaiin bomb 600 siam tura ruahman a ni. Tunah chuan hetiang bomb lian hi ram dang siam chauh hman niin, an siam thar tur erawh hi chu a tlem berah a siamna hmanrua 50% chu India siam ni ngei tura tih a ni bawk.

Project hi peng hnih (two phases) a ṭhen a ni a, EoI tihchhuah atanga kum 2.5 chhunga zawh hman tum a ni. Hmalaknaah hian India rama mimal industry-te leh sorkar hnuaia ralthuam siamtute tan telna hun hawn a ni a, ram dang thiamna lak luh phal a ni bawk. Hetih lai hian Defence Ministry hian ralthuam dang chungchangah pawh hma a la chhunzawm reng a, tun hnai khan BEL nen tlangrama hman tur radar siamna atan cheng vaibelchhe 1,950 hu inremna an lo ziak tawh bawk a ni.