J&K-a firfiakte leiverh hmu chhuak
Border Security Force (BSF) leh Jammu Police-te chuan international border-a ramri kaltlanga lei verh, meter 150-a thui chu Nilaini khan an hmuchhhuak.
Lei verh an hmuhchhuah hi India ram lamah meter 100 vela thui niin, Pakistan ram lamah meter 50 vel a awm bawk. Lei aṭanga feet 25-30 vela thukah verh a ni. Intelligence agency-te chuan he leiverh hi Jaish-e-Mohammad (JeM) firfiakten a ruka India ram luhna atana an hman niin an ngai. Kum 2019, February 14-a Pulwama-a Central Reserve Police Force (CRPF) 40 an thih phahna pawikhawihna rapthlak tak thlentu, JeM hotu lu ber Masood Azar-a tupa, Mohammad Umar Farooq pawh kha he leiverh kaltlanga India rama lut nia ngaih a ni. JeM firfiak pawl hian leiverh hi India ram luhna atan kum 2018 April thla aṭang khan ṭum li vel an hmang hman niin intelligence official-te chuan an sawi bawk.
Counterterrorism official pakhat chuan lei verh chungchang hi nikum March thla khan National Intelligence Agency (NIA) chuan BSF leh Jammu and Kashmir police-te an hrilh tawh a, ngawrh takin a awmna hmun hi zawnchhuah tumin an bei zui a ni. Mahse a ram a chhengchhiat avang leh, hnim sang tak tak a awm avangin zawn hmuh hi a harsa hle tih an sawi.