India-Bangladesh inlaichinna thar siam tumin hma la

Bangladesh prime minister thar, Tarique Rahman leh India palai, Pranay Verma-te chu Thawhṭanni khan Bangladesh khawpui, Dhaka-ah inhmuin ram pahnih inlaichinna thar siam tura hma lak dan tur an sawi dun.

February thla khan Bangladesh inthlanpui neih niin,Rahman kaihhruai Bangladesh Nationalist Party (BNP) an chak a, sorkar thar an siam a ni. Bangladesh sorkar thar a din hnua hruaitu pahnihten inbiakna an neihna hmasa ber a ni. Hei hi ram pahnihte inkar boruak ṭha lo siamṭha tura hma lakna pawimawh tak nia ngaih a ni.

High commissioner Pranay Verma chuan India sorkar aiawhin Bangladesh sorkar thar nena thawh dun zel an duh thu leh, a ṭha zawng, awmze nei leh mipui tana ṭangkai tur inlaichinna neih chu India thil tum a nih thu a sawi. Ram pahnihte hmasawnna tura thawh dun dan tur leh mipui tana chhawr ṭangkai tur kawng hrang hrang an sawi dun.

India-in Afghanistan ṭanpuina a thawn

India sorkar chuan tun hnaia Afghanistan rama tuilian leh lirnghing avanga chhiatna nasa tak tuarte tan chhawmdawlna bungrua (relief materials) chu Pathianni khan a thawn chhuak.

External Affairs Ministry (MEA) thupuangtu, Randhir Jaiswal chuan India chuan Afghanistan mipuite thlawp leh ṭanpui chu a tum ber a ni tih sawiin, ṭanpuina thawn a nih thu hi a puang a ni. Chhawmdawlna bungrua thawn chhuahah hian kitchen set, hygiene kits, tarpaulins, sleeping bags leh plastic sheets-te a tel a ni.