Loneituten ni 50 chhung nawrh huaihawt tawh

Farm law thar pathum duh lohna lantira tiam chin awm loa nawrh huaihawt, loneitute chuan lungawi lohna hi lantir chhunzawm zelin nimin kha nawrh an huaihawt ni 50-na a ni. 

Nawrh huaihawt hnuah loneitute leh sorkar laipui aiawhte chu inremna kawng zawngin ṭum riat an inbe tawh a, mahse inremna an la siam thei lo a ni. Loneitute hian farm law pathumte hi sut leh vek turin an phut a, mahse sorkar chuan sut a tum lo tih a la sawi reng a, dan siamṭhat erawh a inhuam tih a sawi. 

Inremna siam thei loa hun rei tak an awm avang leh, loneituten  nawrh an huaihawt chhunzawm reng a­­vangin Thawhlehni khan Supreme Court chuan heng dan thar pathumte hi hman theih loh turin a dang rih a, inremna siam a nih theihna atana inbiakna neih dante buaipui turin member pali awmna committee a din bawk. Mahse committee member atana ruat mi palite chu a hma pawha farm law thar lo thlawptute an nih avangin mi ṭhenkhat chuan committee din hi an sawisel a ni. 

Sorkar laipui chuan loneitu pawl aiawhte nen inbiakna neih leh a inhuam thu a sawi a, mahse loneitu ṭhenkhat chuan Supreme Court-in an harsatna sutkian dan ngaihtuahtu tur committe a din tawh avangin sorkar laipui nena inbiakna neih leh kher chu a ṭul tawh lo niin an ngai.