Chhattisgarh CM hlui fapa dam chhung tang turin hrem

Chhattisgarh High Court chuan kar liam ta khan an state chief minister hlui, Ajit Jogi-a fapa, Amit Jogi chu kum 2003-a Nationalist Congress Party (NCP) hruaitu thahna thubuaiah thiam loh chantirin, dam chhung tang turin a hrem.

Kum 2003,June 4 khan business-politician, NCP treasurre ni lai Ramavatar Jaggari chu Raipur-ah kah hlum a ni a, hei hi Amit Jogi pa, Ajit Jogi chief minister nih lai a ni. Kum 2007 khan trial court chuan tualthah thubuaiah hian mi 28 thiam loh a chantir a, mahse, Amit Jogi erawh thiam chantir a ni thung. Kum 2011 khan CBI chuan Amit Jogi thiam chantir a nih chungchangah High Court-ah trial court thutlukna hi ngaihtuah ṭha leh turin a ngen a, mahse HC chuan a hnawlsak a ni. Hemi hnu hian CBI chuan Supreme Court-ah a thlen leh a, nikum November thla khan SC court chuan ngaihtuah turin High Court a hriattir ta a ni.

Chhatisgarh High Court-a chief justice Ramesh Sinha leh justice Arvind Kumar Verma awmna bench chuan Amit Jogi chungchang a ngaihtuahnaah, finfiahna hrang hrang aṭangin Jaggari thahna tura phiairruknaah a ruahmanna tur ber a ni tiin, trial court chu thiam a lo chantir tawh chungchangah na takin a sawisel zui a, an rorel dan chu dik lo leh dan kalh a ni, a ti.

Amit Jogi hi High Court thutlukna siam chungchangah nimin khan Supreme Court-ah a zualko ve leh nghal a, Supreme Court chuan April 20 hmaa appeal theh lut turin a lo hriattir a ni.