Foreign Secretary Washington-ah a zin dawn

India leh US inlaichinna tihchak lehzual tuma hmalakna kal zelah, foreign secretary Vikram Misri chu vawiin hian Washington DC-ah a zin dawn a, April 10 thleng a cham dawn tih Ministry of External Affairs (MEA) chuan nimin khan a puang.

External affairs minister S. Jaishankar-a’n kumin February thla khan US a lo tlawh tawh bawk a, ram pahnihte inkarah ‘high-level exchange’ regular taka a awm zel theih nana ruahman a ni. Foreign secretary hian US hotu lian hrang hrangte a hmu dawn a, ram pahnih tana pawimawh thupui hrang hrang- sumdawnna, defence, leh science & technology-a thawhhona thar chungchangte an sawi ho ang.

Kumin chhung hian India leh US hian sumdawnna lama inremna (bilateral trade deal) lian zawk siam an tum a, Misri-a zin chhung hian he thil hi an bawhzui leh dawn a ni. MEA chuan Misri-a'n US a tlawh hi ram pahnihte inlaichinna zau zawk leh hmasawnna tura kawng sialtu a nih an beisei thu a sawi. Foreign Secretary hian ram pahnih hmasawnna chauh ni lo, khawvel bakah regional huapa thil thleng pawimawh tak takte pawh US hotute nen hian an sawi ho nghal dawn a ni.