IAF Chief-in US a tlawh, sipai lam thawh dunna tihchak tum

Indian Air Force (IAF) hotu lu ber, Air Chief Marshal Amar Preet Singh chuan India leh US sipai lam inlaichinna leh thawhdunna tihchak dan tur ngaihtuah turin Thawhṭanni khan US-ah a zin.

Air Chief Marshal Singh hi US-a India ambassador Vinay Mohan Kwatra chuan lo hmuakin, intlawhna hi ram pahnihte van boruak venhimna lama thawh dunna thuk zawk leh chak zawk neih nana hmalakna pawimawh tak a nih thu a sawi. Kum 2025 October-a US secretary of defence Pete Hegseth leh India defence minister Rajnath Singh-te'n ‘Major Defence Partnership’ atana inremsiamna an lo siam tawh chu a bawhzui dawn a ni. Ram pahnih hian tuipui leh boruak lama venhimna (strategic convergence) an kalpui mek bawk.

Tun hnaiah India leh US official-te hi an zin tawn fo a, February khan US Indo-Pacific Command hotu, Samuel J. Paparo chuan India a rawn tlawh tawh bawk. March-ah khan US under secretary of defence, Elbridge Colby pawh rawn zinin, India defence secretary Rajesh Kumar Singh nen 'US-India Defence Policy Group' meeting an nei a ni.