Hmeichhe reservation hlawhtlinna turin PM-in thlawpna a ngen

Prime minister Narendra Modi chuan ram tana hmasawnna pawimawh tak, 'Women’s Reservation Act, 2023' (Amendment Bill) chu chak taka kalpui a nih theih nan MP zawng zawngte thlawpna a ngen a, kum 2029 Lok Sabha inthlan hma ngeia hman a nih theih nan hma lak a tum tih a sawi. April 16-a Budget Session chhunzawm a nih hunah he Bill hi Parliament-ah pharh a ni dawn a ni.

PM Modi chuan thuchhuah siamin, kum 2029 Lok Sabha inthlan leh nakin lawka assembly inthlan lo awm turte chu hmeichhiate tana seat hauhna, 33% reservation hnuaia neih ngei a nih theih nan hma lak a ni dawn a ni, a ti. He Bill hi hmeichhiate tana legislative body-a hmun pawimawh hauhsakna chauh ni loin, ram hmasawnna atana thil hmanhmawh thlak leh thutlukna dik a nih thu a sawi bawk.

Inthliar hranna titawptu tur a ni tih PM chuan sawiin, India hmeichhiate chu science, technology, infiamna leh sipai thlengin hma hruaitu an ni tawh a; mahse, politics leh rorelna khawvelah erawh an nih tur ang an la ni phak lo thung tih a sawi. He hma lakna hi political party pakhat chauh thil ni loin, ram pum huap hmasawnna tur a nih avangin party hrang hrangte chu lungrual taka thlawp turin a sawm a ni. September 2023-a 'Nari Shakti Vandan Adhiniyam' pass a nih laia lungrualna awm kha tunah pawh hian a pawimawh thar hle tih a tarlang.