India-in COP33 thlen tumna a ṭhulh

India chuan kum 2028-a khawvel huap boruak inthlakthleng chungchanga inbiakna lian, 33rd Conference of Parties (COP33) thlen a tumna chu a ṭhulh leh tak thu a puang. He thutlukna hi Ministry of Environment, Forest and Climate Change (MoEFCC) chuan United Nations (UN) hnenah a thlen tawh a ni.

Environment Ministry-a Joint Secretary, Rajat Agrawal chuan April 2 khan UN Framework Convention on Climate Change (UNFCCC) secretariat leh Asia-Pacific group-te hnenah he thutlukna hi a lo hriattir tawh tih tarlan a ni. Ministry thupuangtu Virat Majboor pawhin he thuthang hi a dik tih a nemnghet tawh bawk.

Sorkar thupuangtu chuan, kum 2028-a India-in hnathawh tur leh mawhphurhna dang (commitments) a neih nual avangin he hun lian tham tak thlenna tur hi buatsaih hman a ni dawn lo tih a sawi. A ṭhulh chhan chipchiar zawk erawh puanzar a ni lo thung.

Prime minister Narendra Modi chuan kum 2023-a Dubai-a COP28 neih lai khan, India chuan kum 2028-a COP33 thlen a duh thu leh he conference hmang hian khawvel hmasawnna kawngah 'Global South' te tan aw chhuah a tum thu a lo sawi tawh a ni. He hmalakna hi BRICS ramte pawhin an lo thlawp viau a ni.

Climate activist-te leh mithiamte chuan India thutlukna hi pawi an tih thu an sawi a, India tan khawvel hmaa a hmalakna lantirna tur ṭha leh boruak tibawlhhlawhtute laka mawhphurhna phutna hun ṭha tak a chân niin an ngai. COP33 hi Paris Agreement hnuaiah ram hrang hrangte hmalakna thlirletna, 'Global Stocktake' neih hun tur a ni bawk.