Congress councillor-in Vande Mataram sa duh lo

Madhya Pradesh-a Indore Municipal Corporation (IMC) session, Nilainia neihah Congress councillor Fauziya Sheikh Alim chuan national song, 'Vande Mataram' a sa duh lo a, BJP member-te an lungawi lo a, an inhnial buai zui a ni.

Chairman Munna Lal Yadav chuan member-te inhnial buai avangin Alim chu house chhuahsan turin a ti a, a chhuak zui ta a ni. A hnua a insawifiahnaah, Alim chuan Islam sakhaw vuantu a ni a, Islam leh Quran-in a remtih loh avangin Vande Mataram chu a sa duh lo tih a sawi.

Sorkar laipui chuan kumin January 28 khan sorkar official funcation-ah Vande Mataram chu a chang pumpui, chang ruka sak ziah turin thupek a lo tichhuak tawh a ni. Mahse, a chang tawp lamah Hindu sakhaw kaihhnawih lam thil tarlan tel a nih vangin sawiselna pawh a tam hle a ni.

Fauziya Sheikh Alim-i'n Vande Mataram a sak duh loh chungchangah hian a party, Congress party pawh an ngaihdan a in ang lo ani. Congress councillor, Leader of Opposition Chintu Chokse chuan Vande Mataram sak duh leh duh loh chu mimal duhthlanna a ni a ti a, hemi rual hian an party chuan national song hi an ngaihlu hle tih a sawi a, national anthem leh national song chu Congress thisenah a bet tlat a ni, a ti. Fauziya Sheikh Alim chuan duhthlanna a nei a, mahse, hemi chungchangah hian Congress party ngaihdan a ni kher lo tih a sawi.

Alim chuan ram danpuiin sakhaw zalenna leh ṭawng hman turah pawh zalenna a pe a, India hmangaihna lantirna atan Vande Mataram sa kher tura a tihna khawiah mah a awm lo a ni, a ti. House-ah tui in tur thianghlim tawk lo chungchang sawi chhuah tuma a ding chu BJP member-te chuan Vande Mataram sa hmasa phawt turin an lo ti niin a tarlang.