PM Modi-a'n India hmeichhiate hnena ngaihdam dil a ba - Congress

Congress party chuan prime minister Narandra Modi chuan an party-in women reservation law hman an phutna kum 2024-a a hnawlsak hnuah, tunah sorkar laipui inrelbawlna fel lo leh foreign policy-a tih dik loh thupna atan hman duhin a ngaihdan a thlak leh niin an puh. A hmaa he dan hman an lo duh loh chungchangah PM Modi chuan India hmeichhiate hnena ngaihdam dil a ba a ni, an ti.

Kum 2023 khan Lok Sabha, state legislative assembly leh Delhi assembly-ah seat awm zat aṭanga hmun thuma ṭhena hmun khat (33%) hmeichhiate puala dahna tur, Nari Shakti Vandan Adhiniyam, official-a Constitution (One Hundred and Sixth Amendment) Act, 2023 chu Parliament-ah pass a ni. Congress party chuan he dan hi kum 2024 aṭanga hman nghal an phut a, mahse hei hi PM chuan a pawm duh lo tih an sawi. A chhuanlamah chhiarpui neih tur leh bial siamṭhatte a ngai dawn a hmang tih an tarlang.

Congress hruaitu, Jairam Ramesh chuan PM hian women reservation law hman phutna a hnawl aṭanga thla 30 hnuah, state ṭhenkhata assembly inthlan neih hmabak a nih mek karah, a ngaihdan hi a thlak leh thut tih a sawi. A hmaa chhiarpui leh bial siamṭhat turte chu hun a duh rei dawn lutuk tiin, a chhuanlam siamte chu theihnghilh turin min duh leh si a ni, a ti. "Census Registrr ngei pawhin chhiarpui neih result hi kum 2027-ah tihchhuah a ni dawn tih a sawi chiang a ni. PM hian dawt a sawi a ni," tiin Tamil Nadu leh West Bengal inthlan neih tura hmeichhiate chuan BJP an zawm phah beisein he dan hman chungchangah hmanhmawh takin a ngaihdan a thlang danglam leh niin a puh.

BJP kaihhruai sorkar laipui chuan Women’s Reservation Act 2023 sawi ho turin Parliament budget session neih mek a pawtsei a, April 16-18 chhung rorel ṭhutkhawm nei lehin an sawi ho dawn a ni. Hemi hunah hian Lok Sabha-a member awm zat, 543 aṭanga 816-a tihpunna tur bill pawh an ngaihtuah tel rin a ni bawk. Sorkar laipui chuan kum 2029 Lok Sabha inthlanpui neih hmaa tihfel hman a tum a ni.