WB-ah BJP-in manifesto tlangzarh; hmeichhiate thla tin Rs 3,000 pek an tiam

Union home minister Amit Shah chuan nimin khan West Bengal assembly election neih tur pualin BJP hmalakna tur, 'Sankalp Patra' (manifesto) a tlangzarh. BJP hian hmeichhe vote hip nan thla tin Rs 3,000 pek leh Uniform Civil Code (UCC) hman an tiam.

Manifesto tlangzarhna inkhawmah hian Amit Shah chuan rorellai, Trinamool Congress (TMC) sawiselin, kum 15 chhung zet state an hruai tawh hnuah hmasawnna tak tak a awm loh thu a sawi. TMC sorkar chu eirukna leh dan loa an state-a lut te nena thawk ho angah a puh. BJP-in sorkarna an chan chuan thla ruk chhungin West Bengal-ah UCC hman a nih tur thu a sawi bawk.

Home Minister chuan kum 2016-a TMC sorkarna chu "dawt tiam" vanga ding leh kum 2021-a an sorkar lehna chhan pawh "eirukna leh tharum thawhna" vang niin a sawi. Tun ṭum inthlanah hian Bengal mipuiin inthlak danglamna tak tak a thlen an rin thu a sawi lang bawk a ni.

BJP thil tiam langsar zualte:
- State-a hmeichhia zawng zawngte bank account-ah thla tin Rs 3,000 thun ziah a, sorkar hna leh police-ah hmeichhiate tan 33% reservation siam.

- An sorkar aṭanga thla ruk chhunga Uniform Civil Code hman, "Mi zawng zawng tan dan pakhat" tih thuvawna hman

- Ramri venhimna tihchak a, dan loa lut leh ran tawlhrute lakah 'zero tolerance policy' hman.

- Sorkarna an chan aṭanga ni 45 chhunga 7th Pay Commission hman nghal

- Bengal hnam nunphung vawng nung turin 'Vande Mataram Museum' din an tum bawk