BJP-in special session neih turah MP zawng zawng tel turin hriattir

BJP chuan April 16 aṭanga 18 chhunga Parliament 'special session' neih turah thutlukna pawimawh tak siam a ngaih dawn avangin, Lok Sabha leh Rajya Sabha-a party MP zawng zawngte chu session a tel ngei tura hraittirna nimin khan a tichhuak. Thutlukna siam turah an ṭanrual a ngaih avangin he hriattirna hi a tichhuak a ni.

Party thuchhuah chuan Lok Sabha leh Rajya Sabha-a an MP zawng zawngte bakah, Union Minister-te pawh ni thum chhung awh tur session-ah awm ngei tura tih an ni. "Ni 16 aṭanga 18 chhung hian tuman chawlh an dil thei lo ang a, House chhungah an awm vek tur a ni," a ti.

Special session-a an ngaihtuah pui ber tur chu Women’s Reservation Amendment Bill (Nari Shakti Vandan Act 2023) chungchang a ni. Ruahman lawk dan chuan 'Census' leh 'Delimitation' zawh hnuah chauh he reservation hi hman ṭan tur a ni a; mahse, Census a tlai avangin kum 2011 data hmanga kalpui mai dan tur sorkar hian a ngaihtuah dawn nia tarlan a ni.

Eptu lam erawh special session koh a nih chungchangah an lungawi lo a, Congress president Mallikarjun Kharge chuan PM hnenah lehkha thawnin, opposition-te rawn hmasa loa hetiang session koh hi an duh loh thu a sawi. Delimitation leh hmeichhe reservation hman ṭan tur chungchangah hriatthiam loh leh fiah lo tam tak a la awm thu sawiin, "All-party meeting koh hmasak a ni lo hi a pawi hle a ni," a ti.