Congress-in parliament special sitting-a tel turin party MP-te ngen

Parliament special sitting neih turah BJP-in lower house leh upper house-a an party MP-te tel vek tura a hriattir hnuah, Congess party pawhin nimin khan Lok Sabha-a party MP-te chu special sitting-ah tel vek turin a hriattir ve leh.

BJP kaihhruai sorkar laipui chuan Wome's Reservation Act' siam ṭhatna tur leh thil dang pawimawh dang ngaihtuah turin, Parliament budget session neih lai chu a pawtsei a, April 16-18 hian special sitting an nei dawn a ni.

Congress chuan an party Lok Sabha MP-te hnenah nithum chhung ṭhutkhawm neih turah thu pawimawh tak tak ngaihtuah leh thutlukna siam ngai a awm dawn avangin member-te chu tlanchhe lo a, ṭhutkhawmna hmuna awm ngei turin an hriattir. Thuchhuahah hian, “Congress MP zawng zawngte chu April 16, 17 leh 18-ah zing dar 11 aṭanga ṭhutkhawm ṭin thleng House-a awm vek tura hriattir in ni a, party dinna thlawp turin ngen in ni,” tiin an tarlang.

Special sitting-ah hian ‘Nari Shakti Vandan Adhiniyam’ tia hming vuah ṭhin, 'Women's Reservation Act' hmanga kum 2029-a hmeichhiate tana seat hauh theihna tura siamrem ngaite chu sawi ho a ni dawn a; sorkar laipui chuan he dan hi hman a nih thuai theih nan hma a la mek a ni. Prime minister Narendra Modi chuan he dan siamrem tur hi party hrang hrangte hnenah thlawp tura ngenin, hmeichhiate tana dikna leh chanvo siamsakna kawngah rahbi thar a nih tur thu a lo sawi tawh a ni.

Hetih lai hian,Congress party president, Mallikarjun Kharge chuan sorkar chu inthlan dawn hnaia politic game hmanga ram lak tuma hmanhmawh lutukah a puh thung.