EAM leh UAE President-in India mite himna chungchang sawi dun

External affairs minister S. Jaishankar chuan Pathianni khan United Arab Emirates (UAE) president Sheikh Mohamed bin Zayed Al Nahyan chu Abu Dhabi-ah hmuin, West Asia-a buaina leh a nghawng hrang hrangte bakah, India mi awmte himna chungchang an sawi dun.

Jaishankar chuan UAE President chu prime minister Narendra Modi-a chibai bukna leh duhsakna a hlan a ni. West Asia-a ralmuan lohna nasa tak karah, UAE-a cheng India mi thahnem tak awmte himna tura UAE sorkar hmalakna hrang hrangah lawmthu a hrilh bawk.

Inrinni khan Jaishankar hian UAE deputy PM leh foreign minister Abdullah bin Zayed Al Nahyan pawh hmuin, ram pahnih inkara 'comprehensive strategic partnership' tihchak leh zual dan tur te leh, tuna thil thleng mekin sumdawnna leh economy-a nghawng a neih dan turte an sawi dun tawh a ni.

Jaishankar chuan social media-ah thuchhuah siamin, "UAE President nen hian hun ṭha tak kan hmang a, India mi leh sa UAE-a awmte chungah an hmangaihna an lantir a ni. Ram pahnih inlaichinna tihhmasawnna tura hmalakna an neih chu a rinthlak hle a ni," tiin a tarlang. West Asia buainain khawvel pumpui hmasawnna a tihkhawtlai loh nan leh, tuifinriat lama sumdawnna maritime trade a tihṭhuanawp loh nan ram pahnihte hi thawhdun an tum thu an sawi bawk. EAM hi vawiin hian India-ah a lo let leh tura beisei a ni.