Noida-ah hlawh tihpun phutin nawrh huaihawt

Uttar Pradesh-a industrial khawpui pawimawh, Noida-ah nimin khan hlawh tihpun phutin hnathawktute'n nawrh an huaihawt a, tharum thawhna chhuakin mipui thinrim chuan lirthei an hal bakah lungin thuneitute an bei bawk. Buaina chhuak avang hian National Capital Region (NCR) chhungah venhimna khauh taka kalpui a ni.

Noida Sector 62-a factory hrang hranga hnathawkte an hlawh ennawn a nih hnuah tun thlenga hman a la nih loh avangin lungawi lohna hi an lantir a ni. Thuneitute’n an ngenna an ngaihsak tawk lo niin an sawi. Mipui thinrim hian kawngpui hrula lirthei dingte halin, motor darthlalang leh thil dang an tichhia a, police-te lungin an vawm bawk.

Gautam Buddh Nagar Police-te chuan mipui thinrim bengdaih nan hma an lak thu sawiin, buaina chhuak pawh an thunun thei tih an sawi. Industrial zone hrang hrangah police leh paramilitary force-te duty tir an ni bawk a ni. Uttar Pradesh DGP Rajeev Krishna chuan he tharum thawhnaa inhnamhnawihte chu zawn chhuah a, dan anga hrem an nih tur thu a sawi.