India leh Oman-in sumdawnna tihlen dan tur sawi dun

India leh Oman sorkar chuan ram pahnih inkara sumdawnna leh Comprehensive Economic Partnership Agreement (CEPA) tihhlawhtlin dan tur chungchang an sawi dun. Thawhlehni khan union commerce and industry minister Piyush Goyal leh Oman commerce minister Anwar bin Hilal bin Hamdoun Al Jabri-te chuan he inremnain ram tana hmasawnna thar a thlen theih dan tur an rel a ni.

Comprehensive Economic Partnership Agreement (CEPA) hi nikum December 2025 khan Muscat-ah ziahfel a lo ni tawh a, he inremna hnuaiah hian India-in Oman-a thil a thawn chhuah 98% -ah chhiah lak a ni dawn lo a, chhiah lak lohna tur zingah hian textile, agriculture, leh leather goods-te a tel. India pawhin Oman aṭanga lo lut dates, marble, leh petrochemical thilah chhiah a tihniam ve dawn bawk.

Tun hnaia West Asia buaina thlengin tuipui kaltlanga bungraw thawn chhuahnaah harsatna nasa tak thlenin, India-in Gulf ram hrang hrang nena sumdawnna a neih, USD tld 178 hu chu tuipui lam kawng a him tawk loh avangin a nghawng buai hle a ni.

Minister Piyush Goyal chuan Oman bakah Saudi Arabia, UAE, Bahrain, leh Kuwait-a trade minister-te pawh be pawpin, harsatna karah pawh sumdawnna kawng hawn a nih zel theih nan hma a la a ni. Kum 2024-25 chhung khan India leh Oman-te insumdawn tawnna USD tld 10.5 a tling phak a, India hian USD tld 4 hu thil thawn chhuakin, USD tld 6.54 hu bungrua a la lut thung.