Nitish Kumar-a'n Bihar CM aṭanga banna theh lut

Janata Dal United (JDU) hruaitu, Nitish Kumar chuan Rajya Sabha member atana thlan a nih tak avangin nimin khan Bihar chief minister a nihna aṭangin banna a theh lut. A banna theh luh hi governor, Lt. Gen. (Retd.) Syed Ata Hasnain chuan a pawmsak nghal. Banna a theh luh hmain Kumar a kaihhruaina hnuaia state cabinet meeting hnuhnung ber a ko a ni.

Bihar Chief Minister term 10 lo chelh tawh, Kumar hi April 9 khan Rajya Sabha member atan lak luh a ni a, Lok Sabha member atan ṭum ruk thlan tlin lo ni tawh mah se, Rajya Sabha member a nih ṭum khatna a ni thung.

Nitish hi kum 1989 a politics a luhchilh hnuah, legislative body pali - Lok Sabha, Rajya Sabha, Bihar Legislative Assembly leh Bihar Legislative Council-ahte thlan tlin a ni ta vek a ni. Kum 1999-2004 khan sorkar laipuia Atal Bihari Vajpayee kaihhruai NDA sorkarah union minister a ni tawh a, kum 2005 aṭangin Bihar Chief Minister a ni bawk.

Bihar-ah hian NDA hnuaiah JDU leh BJP thawk dunin sorkar an siam a, CM aṭanga Nitish Kumar a ban tak avangin a thlaktu, chief minister thar tur BJP aṭangin ruat a nih rin a ni a, Bihar-in BJP-in Chief Minister dinhmun an chelh vawi khatna tur a ni ang. Deputy chief minister, BJP member Samrat Choudhary chu CM thar tura sawi rik ber a ni a, Nitish Kumar pawhin a thlawp nia sawi a ni. Nimin tlai khan BJP legislator-te chuan meeting an nei a, a hnuah NDA legislator-ten meeting nei ve lehin, CM thar tur hi an tihfel rin a ni. Member 243 awmna Bihar assembly-ah hian BJP hian member 89 neiin, JDU hian 85 a nei a ni.