India-in BRICS leh Quad Foreign Minister meeting thleng dawn

India chuan kumin May thla chhung hian BRICS leh Quad group-a tel ram foreign minister meeting a thleng dawn tih official thuchhuah chuan a tarlang. Tun hnaia Iran leh Israel inkar buaina vanga khawvel boruak a ralkhel hnua ram hrang hrang hruaitute hmaichhana an inbiakna hmasa ber tur a ni

BRICS meeting-ah hian kum 2023-a tel thar Iran leh United Arab Emirates (UAE) hotute pawh an tel dawn a, February 28-a U.S. leh Israel-ten Iran an beih hnua Iran leh UAE hotute hmaichhan ngeia an inhmachhawn hmasak berna tur a nih avangin ngaihven pawh a hlawh hle ang. UAE hian Iran-in drone leh missile hmanga Gulf ram hrang hrang a beih chu nasa takin a lo sawisel tawh a ni.

Sorkar thuchhuah tarlan danin, May thla tawp lam hian Quad groupa tel ram India, U.S., Japan leh Australia foreign minister meeting pawh neih tum a ni bawk. India hian kum hnih chhung Quad summit a thlen tawh loh avangin kumin hian hlawhtling taka neih an tum ruh hle.

Meeting-ah hian West Asia boruak ralkhel avanga khawvel energy dinhmun buai mek leh, Iran-in Strait of Hormuz a hrek tlat avanga sumdawnna kawng ping chungchangte sawi ho a ni ang. India external affairs minister S. Jaishankar chuan Japan leh Australia Foreign Minister-te pawh be pawpin, he meeting atan hian inbuatsaihna an kalpui ṭan tawh a ni.