ED-in AAP MP Mittal-a in leh university an dap

Enforcement Directorate (ED) chuan nimin khan Aam Aadmi Party (AAP) Rajya Sabha MP, Ashok Mittal-a chenna in leh a university din, Jalandhar-a Lovely Professional University leh Gurugram-a Tetr College of Business leh Masters Union College of Business te an dap. He thil vang hian AAP chuan BJP leh prime minister Narendra Modi chu na takin an sawisel zui nghal.

AAP hotu chuan Arvind Kejriwal chuan ED chet dan chu sawlsein, Punjab assembly inthlan neih tur atan prime minister Narendra Modi a inbuatsaih ṭan a ni, tiin a X-ah a post. Kejriwal chuan Punjab mipui chuan ED chet tir an nih dan chu an enliam mai dawn lo a, a vawi hnihna atan BJP chu an paihthla leh dawn a ni, a ti.

Punjah chief minister, AAP hruaitu Bhagwant Mann pawhin Mittal in leh a university dap a nih chungchang hi X-ah tarlang ve bawkin, BJP chu inthlan neih tur atan a inbuatsaih chho a ni a ti a, ED chet tir an nih dan chu Modi-a style dik tak a ni, a ti bawk.

AAP hian tun hnaiah Rajya Sabha-a an party deputy leader, Raghav Chadha thlakin, Ashok Mittal hi a ruat thar a ni. Kum 61 mi, Mittal hi bussiness leh educationist a ni ṭhin a, Lovely Professional University, Punjab dintu niin, kum 2022-ah politics a luhchilh a, hemi kum hian Rajya Sabha member atan thlan tlin a ni.

ED hian Mittal nena Jalandhar leh Gurugram-ah Mittal nena inzawmna nei hmun 10 an dap a, Foreign Exchange Management Act (FEMA) hnuaiah he thil kalpui an ni tih an sawi.