Bihar-a BJP CM hmasa ber Samrat Choudhary la lut

Bihar politics chuan bung thar kaiin nimin khan BJP hruaitu hlun Samrat Choudhary chu Bihar Chief Minister 24-na atan lak luh a ni. Bihar chanchina BJP-in CM dinhmun an chelhna hmasa ber a ni. CM thar hi Patna-a Lok Bhawan-ah governor Syed Ata Hasnain chuan rinawmna thu a tiam tir a ni.

Kum tam tak Bihara hruaitu lo ni tawh , Janata Dal United hruaitu Nitish Kumar chuan Rajya Sabha member atana thlan a nih avangin Thawhlehni khan CM a nihna ṭangin banna a thehlut a, hemi hnu hian National Democratic Alliance (NDA) hruaitute chuan Samrat Choudhary hi CM atan an thlang nghal a ni.

CM lak luh rual hian JD(U) hruaitu Vijay Kumar Choudhary leh Bijendra Prasad Yadav-te pawh minister atan lak luh an ni nghal a, an pahnih hian Deputy CM ah dah an ni dawn a ni. Nimina CM thar lak luh inkhawmah hian NDA thlawptu party hrang hrang hruaitute leh state ṭhenkhat CM-te an tel.

Bihar sorkar tharah hian NDA hnuaiah BJP leh JD(U) bakah party tenau dang pathum an thawk ho dawn a ni. CM thar hian nimin khan sorkar official-te nen inkawmna hun an hmang nghal a ni.