CAA Petition : SC-in CAA a stay lo Nakkum January-ah hearing nei leh dawn
Supreme Court chuan nimin khan Citizenship (Amendment) Act khinna thehlutte chu a ngaihtuah a, mahse he dan lo dang (stay) rih tura ngenna a hnawl.
Chief Justice of India SA Bobde kaihhruai judge pathum awmna, Supreme Court bench chuan CAA khinna petition lutte hi nimin khan a ngaihtuah a ni. Bench chuan CAA hian ram danpui a kalh em tih a zirchiang dawn tih a sawi a, hemi rual hian petition 59 thehluhten citizenship law siam thar chu ram danpui kalh a ni tia an sawi chungchang chu chhang let turin sorkar laipui a hriattir a, a chhanna hi kar hnih chhunga thehlut turin a ti a ni.
Bench chuan lawyer Ashwini Apadhyay ngenna anga mipui nawlpuite hnena CAA chungchang hrilhfiah tura ngenna chu remtiin, sorkar laipui aiawhtu Attorney General KK Venugopal hnenah audio-visual hmanga mipuite hnena he dan hrilhfiah dan ngaihtuah turin a ti.
CAA petition ngaihtuahtu bench-ah hian CJI bakah justice BR Gavai leh Surya Kant-te an awm a, petition-te hi nakkum January 22 ah hearing neih leh turin an ti a ni. Sorkar laipuiin Citizenship law a siam thar hmang hian December 31, 2014 hmalama Pakistan, Afghanistan leh Bangladesh aṭanga an sakhua avanga tihduhdahna tawh vanga India rama tlanchhiate chu, Muslim sakhua tel loin sakhaw dang - Hindu, Kristian, Sikh, Buddhist leh Parsi te chu India khua leh tui nihna pek an ni dawn a ni.
Sakhaw behchhana dan siam hian sawisel leh dodal a tawk nasa hle a, eptu party hrang hrang bakah NGO, ṭhalai leh zirlai pawlten CAA duh lohna lantir hian nawrh an huaihawt fo a ni. Hmun ṭhenkhatah chuan tharum thawhnate thlengin buaina nasa tak a chhuak bawk.
CAA khinna hi Supreme Court-ah hian a lut hnem hle a, petition thehluttu zingah hian Congress leader Jairam Ramesh, All India Majlis-e-Ittehadul Muslimeen (AIMIM) chief Asaduddin Owaisi, Trinamool Congress MP (TMC) Mahua Moitra, Rashtriya Janata Dal (RJD), Jamiat Ulema-e-Hind, Tripur lal chhungkhaw thlah Pradyot Kishore Deb Barman, Indian Union Muslim League (IUML), All Assam Students Union (AASU) leh midang tam tak an tel a ni.