Eptu pawl hruaituten CAA sût turin ngen

Congress interim president Sonia Gandhi kaihhruaiin, Thawhlehni tlai hian eptu party 12 aiawhte chuan President Ram Nath Kovind chu a chenna inah hmuin, sawisel hlawh tak Citizenship (Amend­ment) Act chu sût leh tura sorkar laipui nawr turin an ngen. 

President an hmuh hnua chan­chinthar lakhawmtute a kawmnaah, Sonia Gandhi chuan BJP sorkar chuan mipuite aw ngaihthla duh loin, mipuiten an pawm theih loh dan chu a siam lui a ni, a ti. Rampumah CAA dodalna a awm a, Delhi leh hmarchhak-a nawrh huaihawtte laka police-te chetdan chu an dem hle tih a sawi bawk. 

Eptu pawl hruaitu, President hmu tura kalte hi Sonia Gandhi bakah, Trinamool Congress leader Derek O’Brien, Dravida Mun­netra Kazhagam (DMK) TR Baalu, Samajwadi Party hruaitu pahnih Ram Gopal Yadav leh Javed Ali, Communist Party of India (Marxist) general secretary Sitaram Yechury, Communist Party of India (CPI) hotu D Raja, Rashtriya Janata Dal aṭangin Manoj Jha, Indian Union Muslim League hruaitu ET Mohammad Basheer, National Conference aiawhin Hasnain Masoodi leh All India United Democratic Front aṭangin Sirajjudin Ajmal te an ni. 

Anni bakah hian Congress party hruaitu hlun AK Antony, Ahmed Patel, Ghulam Nabi Azad, Kapil Sibal, Anand Sharma leh Jairam Ramesh te pawh an tel. President Ram Nath hnenah hian ram hruaitu a nih angin, Indian Constitution venghimtu tur a ni a, Constitution chu palzut a nih lohna tura venghim turin an ngen. Citizenship Amendment Act chungchangah President chu inrawlh tur leh,  he dan hi sut tura sorkar hrilh tura an ngen thu sawiin, eptu hruaitute hian President hnenah hian memorandum an thehlut a ni.