Thla khat chhungin state 8-ah internet service titawp

Chhan hrang hrang avangin sorkar laipui chuan thla khat chhungin India ram state 8-ah internet service a titawp tawh. 

November thla khan Ayodhya rama Hindu leh Muslim te ram inchuh thubuai avangin, Uttar Pradesh-a Agra leh Aligarh-ahte leh Rajasthan leh Madhya Pradesh hmun ṭhenkhatahte internet service titawp a lo ni tawh a ni. 

Kar liamta khan Citizenship (Amendment) Act 2019 (CAA) avanga North East leh India ram hmun hrang hranga duhlohna lantira nawrh huaihawt a nih chungchangah, sorkar laipui chuan Assam, Meghalaya, Tripura leh Arunachal Pradesh hmun ṭhenkhatahte internet service a titawp bawk. Heng state bakah hian West Bengal hmun ṭhenkhatah pawh internet service hi titawp lailawk a lo ni tawh bawk a ni.

J&K-a internet service tihtawp ni 136-na

Vawiin hi J&K-a internet service tihtawp a nih aṭanga ni 136-na a ni. India rama internet service tihtawp a nih rei ber dawttu a ni bawk. Sorkar laipuiin Jammu and Kashmir (J&K) special status Article 370 a hlihsak hma zan, August 4 zanlai aṭangin J&K-ah hian internet service tihtawp a ni a, vawiin thlengin Kashmir Valley-ah hian internet service hi tihnun a la ni lo.

Kum 2016 July 8 khan J&K-a Kashmir Valley-a hel pawl, Hizbul Mujahideen hruaitu Burhan Wani chu Kashmir chhim lam, Anantnag district-a Kokernag biala security force-te nen an inbeihnaah kahhlum a ni. Hei vang hian mipuiten lungawi lohna an lantira, hmun hrang hranga tharum thawhna thlen vangin, sorkar laipui chuan hemi kum July 8 aṭangin 2017, January 7 thleng J&K-a internet service a titawp a ni. Ni 202 chhung tihtawp a ni a, hei hi India rama internet service tihtawp rei ber ṭum a ni. 

Jammu and Kashmir-ah hian kum 2016 aṭang khan ṭum 193 internet service tihtawp a lo ni tawh a, a dawtah hian Rajasthan awmin, anni state-ah hian internet servicee ṭum 42 tihtawp a lo ni ve tawh bawk.