Rajya Sabha Deputy Chairman thlan tur eptu lamin boycott dawn

Rajya Sabha Deputy Chairman thlanna, vawiina neih tur chu eptu pawlte chuan lungawi lohna lanttir nan inthlan hi boycott an tum tih Congress hruaitu Jairam Ramesh chuan nimin khan a puang. Lok Sabha-a Deputy Speaker kum sarih chhung ruat a nih loh avang leh, sorkarin eptu pawlte nena inrawnna a neih loh avanga kalpui tum a nih thu a sawi.

Jairam Ramesh chuan X kaltlangin an boycott chhan tur kawng thum a tarlang a; Modi kaihhruai chuan kum sarih chhung Lok Sabha Deputy Speaker a ruat lo hi thil thleng ngai lo a nih thu a sawi. Deputy Chairman atana NDA candidate Harivansh chu president Droupadi Murmu-i'n Rajya Sabha member atana a ruat a ni a, hetiang member nominate hi he hmun pawimawh chelh tura theh chhuah hi thil thleng ngai lo a ni tih a tarlang bawk.

Eptu pawlte chuan J.D.(U) hruaitu Harivansh chu mimal taka hmuhsitna emaw, zah lohna emaw an neih loh thu sawiin, sorkarin eptu pawlte nena engmah inrawnna mumal a nei lo chu pawi an tih thu an sawi. Ramesh chuan "Harivansh 3.0" hian eptu pawlte ngenna leh duh dante a ngaihtuah sak zawk an beisei thu a sawi lang bawk a ni.

Harivansh hi April 9 khan a term a tawp tawh a, mahse, president Murmu chuan April 10 khan Rajya Sabha member atan ruat nawn lehin, nimin khan rinawmna thu tiam tirin lak luh a ni.