India Post-in Axiom Mission hriatrengna stamp tlangzarh

India ram hmasawnna leh vanthengreng luhchilhna kawnga thil chhinchhiah tlak tak, Axiom Mission hriatrengna 'commemorative stamp' chu India Post chuan Nilaini khan a tlangzarh. He hun hi Bengaluru-ah hman niin, ISRO chairman V Narayanan leh he mission-a tel, India mi International Space Station (ISS) tlawhtu hmasa ber Group Captain Shubhanshu Shukla-te'n an hmanpui a ni.

Stamp thar hi Manish Tripathi, 'aantarDESI' dintuin a design a ni a, India-in mihring vanthengrenga a tirh luh a tumna 'Human Spaceflight' kawnga a thlen chin entirna pawimawh tak a ni. Tripathi chuan he hunah hian thu sawiin, "Astronaut suit-a kan hman thin emblem kha ram tana hriatrengna stamp-ah a lo chang ta hian min va ti hlim em! Stamp hi thil inthawnna mai a ni lo a, hun kal tawh chhinchhiahna hlu tak a ni," tiin a sawi.Shubhanshu Shukla hian ISS-a ni eng emaw zat hun a hmang a ni.

Stamp-ah hian vanthengreng luhchilhna hmanrua leh India flag-te mawi takin tarlan a ni. India Post hian ram chhunga hmun hrang hrangah he stamp hi mipui lei theih turin a sem chhuak nghal ang.

India-in 2027-a thla leilunga inkahhai a tumna, Gaganyaan Mission atan inbuatsaihna pawh kalpui mek a ni a, tunah hian Gaganyatri-te hi 'extreme heat trials' hmachhawn turin an inbuatsaih leh mek bawk.