PM-in a hawn hma niin Rajasthan Refinery a kang

Rajasthan-a Pachpadra refinery chu vawiin hian prime miniser Narendra Modi-a hawn tura ruahman a nih laiin, nimin khan a kang.

Kangmei hi refinery-a CDU (Crude Distillation Unit) section aṭanga chhuak a ni a, thi leh hliam erawh an awm lo nia hriat a ni. He refinery hi India rama greenfield integrated Refinery-cum-Petrochemical Complex hmasa ber a ni a, Hindustan Petroleum Corporation Limited (HPCL) leh Rajasthan sorkar thawk dunin an siam a ni. India energy security thuam chakna tur leh, ram dang aṭanga a lak luha a innghat lutuk tur tihziaawmna tur atana ṭangkai tak tura ngaih a ni.

Refinery dinna tur lungphum hi kum 2013, September 22 khan Rajasthan-a Ashok Gehlot kaihhruai Congress sorkar a din laiin Congress party hruaitu, Sonia Gandhi-i'n a phum a, hna thawhna tur atan hian Rs vbc 37,230 ruahman a ni. State sorkar a inthlak hnuah, kum 2018, January 16 khan prime minister Modi chuan project hi hawng thar lehin, a senso tur pawh Rs vbc 43,129 ah siamṭhat a ni bawk.

He refinery-ah hian fuel bakah petrochemical product lam pawh siam chhuah beisei a ni a, hei hi an bial chhunga industrial unit-te tana high-quality raw material an hmuh theihna tur atana tih a ni.