NSA Doval leh Saudi Arabia hruaitute inkawm

India National Security Advisor (NSA) Ajit Doval chuan nimin khan Saudi Arabia tlawhin, ram hruaitu pawimawhte nen inbiakna pawimawh tak an nei. An inkawmnaah hian ram pahnih inlaichinna bakah, tualchhung boruak leh West Asia-a thil thleng mekte thuk zawkin an sawi ho.

NSA Ajit Doval hi Pathianni khan Riyadh thlengin, Airport-ah India ambassador Suhel Khan leh Saudi Arabia deputy minister for political affairs Saud Al-Sati ten an lo hmuak. Doval hian Saudi foreign minister Faisal bin Farhan, energy minister Abdulaziz bin Salman leh an national security advisor Musaed Al-Aiban te a hmu a ni.

India Embassy chuan thuchhuah siamin, he inkawmnaah hian ram pahnih hmasawnna tura thawh hona tharte, inremna awmsa bawhzui dan tur leh ram pahnih tana chhenfakawm tur thil hrang hrang an sawi ho tih an tarlang. Hei bakah hian West Asia-a dinhmunte pawh an sawi ho tel a ni.

Ajit Doval-in a tlawh chhan ber pakhat chu tun hnaia US leh Iran inkar siamrem tuma Pakistan-a inbiakna neih tur nen a inzawm nia sawi a ni. Kar hmasaa US leh Iran ten inbiakna an neih hmasak chu thutlukna mumal awm loa a tawp tak avangin, inbiakna vawi hnihna neih leh hma hian India chuan he biala a thawhpui pawimawh Saudi Arabia hi a tlawh a ni. Saudi Arabia hi West Asia-a India thawhpui lian ber niin, energy security lamah pawh a thawhpui pawimawh tak a ni bawk.