India leh UN hruaituin thawh ho dan tur sawi

Ministry of External Affairs (MEA) Secretary (West), Sibi George leh UN-a Assistant Secretary-General (West Asia, Asia leh Pacific), Khaled Khiari te chu Thawhlehni khan New York-ah inhmuin, khawvel hmun hrang hranga remna leh muanna a awm theih nana thawh ho zel dan tur chungchang an sawi dun.

Hruaitu pahnihte hian UN Peacekeeping operation chak zawka kalpui dan tur leh, ram hrang hrang inkarah India-in mawhphurhna a lak chhunzawm zel dan turte uluk takin an sawi a ni.

UN-a India Permanent Mission chuan thuchhuah siamin, he inbiakna hi 'hlawkthlak tak' a nih thu an sawi a; khawvel hmun kilkhawr zawka buaina thleng ṭhinte sutkian dan tur leh, UN-in remna a zawnna kawnga India sorkar nena thawh dun zelna turte chu an sawi ber a nih thu an tarlang bawk.

India hi UN Peacekeeping mission-a thawk tur sipai thawh hnem ber ram zinga mi a ni a, kum 1948 aṭanga vawiin ni thleng hian India sipai 2,75,000 chuang zet chu UN flag hnuaiah khawvel hmun hrang hrangah muanna sipai hna thawk tura thawn chhuah an lo ni tawh a ni. Tun hnaiah South Sudan-a hmun pawimawh tak hawn a nih theih nana India mi peacekeeper-te hmalakna chu UN chuan fakawm a tih thu a lo tarlang tawh a ni. India sipaiten rim taka hna an lo thawh tawh ṭhin avang hian United Nations chuan India chu UN thlawptu leh a thawhpui rinawm tak a nih thu a lo tarlang a tawh a ni.