Amit Shah-a'n thla 6 chhungin WB-a Gorkha buaina chinfel tiam

Union home minister Amit Shah chuan nimin khan West Bengal-ah BJP-in sorkarna an siam a nih chuan, thla ruk chhunga Gorkha-te harsatna tawh ṭhin zawng zawng chinfel sak vek a tiam.

Darjeeling district-a Kurseong-a inthlan campaign-naa thu sawiin, Shah chuan BJP sorkar chuan Gorkha-te thil phut leh an duh dan chu a hriatthiampui tih a sawi a, an duh dan ang ngeia inremna ziahpui a nih tur thu a tarlang. "West Bengal-a BJP sorkar a pian hnu thla ruk chhungin Gorkha tinte hmelah hlim hmel kan thlen ang," a ti.

Home Minister chuan Gorkhaland movement vanga lung in tang mek leh thubuai neite pawh sorkar thar hnuaiah an thubuai hlihsak vek an nih tur thu a sawi bawk. He buaina hi sorkar lo piang tawh hrang hrangte’n an lo ngaihpawimawh tawk loh avanga rei tak kalsual tawh a nih thu sawiin, Congress leh TMC-te chu Gorkha-te chunga dik lo taka thiltiah a puh.

West Bengal chief minister Mamata Banerjee sorkar bei zuiin, Gorkha buaina chungchanga vawi thum inbiakna a koh pawhin state sorkar aiawh tumah an tel loh thu a sawi. Mamata-i kaihhruai sorkar chu tun ṭum inthlanah hian 'bye-bye' hun a nih thu leh, Bengal chu TMC-te tharum thawhna laka fihlim tir a hun tawh thu a sawi bawk.

Shah chuan Gorkha ṭhenkhatte hming, electoral roll aṭanga paihsak tawh pawh a nihna ngaia dah leh vek a nih tur thu sawiin, "He inthlan hi kan nu leh farnute himna tur a ni a, tualthattu leh hmeichhe chunga hleihluak taka thiltitu apiang chu tan inah kan khung vek ang," tiin a sawi bawk a ni.