Thisen an dawn aṭanga HIV kai naupangten zangnadawmna phut

Jharkhand-a naupang panga, nikuma sorkar damdawi-in, Chaibasa Sadar Hospital aṭanga thisen thianghlim lo an dawn avanga HIV kai phah nia sawite chuan Jharkhand High Court-ah petition an theh lut a, sorkar chu zangnadawmna Rs vbc 1 ṭheuh pe tur leh, an dam chhung damdawi lama enkawlna pe turin an phut.

Petition hi naupang palite aiawhin advocate Md.Shadab Ansari chuan a theh lut a, heng naupangte hi Scheduled Tribe leh OBC ami vek niin, an nu leh pate chu nitina inhlawhchawp an nih thu a sawi. Petition-ah hian naupangte hminga an awmna tur in pe tur leh, an natna chungchangah pawh counselling pe tura phutna pawh an tarlang tel a ni. Naupang palite dinhmun enfiah a, an inenkawlna tur mamawhte zirchiang a ngaihtuahtu tur Special Medical Board din turin an phut bawk.

Jharkhand sorkar chuan thisen thianghlim lo dawn vanga HIV kai, naupang palite hnenah zangnadawmna Rs nuai 2 ṭheuh pek an nih tur thu leh, he thila mawhphurtu official-te suspend an nih thu sawi tawh mah se, an aiawha petition theh luttu hian hei hi a tawk lo tih a sawi. An chhungkaw dinhmun leh, an natna avanga khawtlanga enhran an tawh dante chu ngaihtuahpui ngai tak an nih thu a tarlang. Damdawi-ina thawkte inthlahdahnaah sorkar chuan mawhphurhna lian tak a nei a, an pawi khawihna hi Article 21-a right to life bawhchhiatna lian tak a nih thu a sawi.

Chaibasa Sadar Hospital-a naupang damlo enkawl pakhatin HIV hri a kai tih hriat a nih hnuah Jharkhand High Court chuan he thil thleng hi chhui chiang turin thupek a tichhuaka ni. Medical team-in blood bank lam an endik hnuah, naupang dang pali, kum 5-7 inkarte chuan he hospital-a thisen an dawn aṭangin HIV an kai tih hriatchhuah a ni ta a ni.