AAP aṭangin Raghav Chadha leh MP 6 an bang; BJP an zawm dawn tih an puang nghal

Aam Aadmi Party (AAP) in Rajya Sabha-a party deputy leader aṭang an ban tak, Raghav Chadha leh Rajya Sabha-a party MP dang paruk chuan nimin khan AAP aṭanga an ban thu an puang a, Bharatiya Janata Party (BJP) an zawm tur thu an sawi nghal bawk.

Raghav Chadha bakah AAP aṭanga bang MP dangte chu - Swati Maliwal, Harbhajan Singh, Sandeep Pathak, Vikram Sahney, leh Rajinder Gupta te an ni. Chadha chuan Rajya Sabha-a AAP MP hmun thuma ṭhena hmun hnih aia tamin AAP hi an chhuahsan tih a sawi. AAP hian Rajya Sabha-ah member 10 a nei a ni.

AAP a chhuahsan chhan sawiin, Chadha chuan kum 15 chhung chu AAP tan a theihna zawng zawng a seng a, mahse, tuna party kal dan chu an thuthlung leh innghahnate nen a inpersan vek tawh a ni, a ti. 'Party chuan ram tan leh ram mipui tana thawk tawh loin, mimal hlawkna atan chauh a thawk a ni. Mi tam takin a hma pawhin min lo hrilh fo tawh a, tunah chuan an sawi ang, 'party dik loah ka awm a ni' tih hi kei pawhin ka hrethiam ta," tiin, Aam Aadmi Party chet dan dik lo taka tel zel duh loin a chhuak tih a sawi.

April 2 khan AAP chuan Chadha hi Rajya Sabha-a party deputy leader aṭangin a ban a, parliament-ah prime minister Narendra Modi leh sorkar laipui sawiselna lam sawi chhuak ngam loah an puh. Mahse, Chadha chuan an puhna hi phain, parliament-ah chuan inhnialbuai ringawt tur loin, mipuite mamawh auchhuahpui tur zawka awma ni tih a sawi. A nihna aṭanga ban a nih hnuah Chadha hian social media lamah pawh vieo leh post eng emaw zat a siam a ni.