CM Omar-a'n J&K state-a hlankai loh chhanah BJP puh

Jammu & Kashmir chief minister Omar Abdullah chuan nimin khan sorkar laipuia sorkarna chelhtu BJP chu na takin a bei a, National Conference (NC) thlawptu mipuite chu statehood pek duh lohna hmanga hrem tumah a puh. He thu hi Assembly-a BJP hruaitu Sunil Sharma-a’n J&K statehood chungchang a sawi avanga sawi chhuak a ni.

Chief Minister chuan a X kaltlanga thuchhuah siamin, Naushera-a NC-in rally lian tak an neih vanga BJP manganna chu thup rual a ni lo tih a sawi. "A tawpah chuan BJP hian an rilru tak tak an rawn sawi chhuak ta; NC vote-tu J&K mipuite chu statehood pek duh lohna hmangin an hrem dawn tih a hriat mai," a ti. BJP-in J&K tana tiam hrang hrang an neihte chu dawt vek a nih thu a sawi bawk.

Hetih lai hian BJP senior leader leh Leader of Opposition (LoP) Sunil Sharma chuan sorkar thuchhuah chu thlawpin, statehood hi 'hun bitukah' pek a la ni dawn tih a sawi. Mahse, hei hi mimal emaw, chhungkaw bik emaw vanga pek tur a nih loh thu a sawi thung. Sharma chuan Omar Abdullah chu 'Shehzada' (Prince) tia koin, Sheikh Abdullah thlah a nih vanga statehood pek nghal ngawt chu thil theih loh a nih thu sawi.

Statehood chungchang hi J&K-ah politics boruak tilian bertu a ni mek a, kum 2019-a Article 370 ṭhiah a nih hnua Union Territory-a ṭhen tak Jammu and Kashmir hi state puitling nihna pek let a la ni lo.