Bihar Assembly-ah NDA sorkarin fiahna paltlang

Bharatiya Janata Party kaihhruai National Democratic Alliance (NDA) sorkar chuan nimin khan state assembly-ah voice vote hmangin sorkar rintawkna fiahna a paltlang. Chief minister Samrat Choudhary chuan House-a trust vote lakna tur motion hi a pu lut a ni.

House-ah minute 90 chhung debate neih a nih hnuah, speaker Prem Kumawr chuan sorkar rintawkna motion put luhah vote lain a tlang ta a ni. Speaker chuan sorkar thar chu lawmpuina a hlan nghal bawk.

Bihar-ah hian Janata Dal United hruaitu, Nitish Kumar chu chief minister aṭanga a ban avangin state cabinet ṭhiah a ni a, BJP hruaitu Samrat Choudhary chu chief minister thar atana ruatin a kaihhruai sorkar thar din a ni. April 15 khan CM thar leh cabinet minister atan JDU Bijendra Prasad Yadav leh Vijay Kumar Choudhary-te chu Lok Bhawan-ah rinawmna thu tiamtira lak luh an ni a, an pahnih hian deputy chief minister-ah dah an ni dawn nia sawi a ni. CM hian a cabinet pawh May chawlhkar hmasa berah a tihlen rin a ni.

Rorellai, NDA hian member 243 awmna Bihar assembly-ah MLA 201 a nei a, eptu lamin MLA 35 an nei bawk. Choudhary hi Bihar-ah BJP chief minister ni thei hmasa ber a ni. BJP kaihhruai NDA-ah hian JD (U) bakah union minister Chiraq Paswan kaihhruai Lok Janshakti Party (Ram Vilas), union minister Jitan Ram Manjhi party Hindustani Awam Morcha (Secular) leh Rajya Sabha MP UPendra Kushwaha kaihhruai Rashtriya Lok Morcha (RLM) party an tel.