CAA protest : Delhi-ah CrPC section 144 puang

Ramchhung hmun hrang hrangah Citizenship (Amendment) Act 2019 duh lohna lantirin nawrh huaihawt chhunzawm zel a ni. 

Delhi khawpuia nawrh huaihawtte hi a tirah chuan Red Fort bulah an pungkhawm a ni. Mahse police-te chuan nawrh huaihawt hi phalsak loin khawpui chhung hmarchhak bial  leh Red Fort area-ah mipui punkhawm khapna, IPC Section 144 an puang. Mahse pungkhawm an awm belh zel avangin police-te chuan an zinga eng emaw zat an man zui a ni. Man zingah hian Swarajya Abhiyan chief Yogendra Yadav pawh a tel. Ani bakah hren zingah hian Left Party hruaitu D Raja, Sitaram Yechury, Nilotpal Basu, Brinda Karat leh Congress hruaitu Ajay Maken leh Sandeep Dikshit te bakah activist Umar Khalid te pawh an tel. 

Nimina CAA dodala nawrh huaihawt vang hian Delhi metro station 19 khar a ni a, telecom service provider Airtel, Vodafone Idea leh Reliance Jio te chuan khawpui chhung hmun ṭhenkhatah internet, voice leh messaging service an titawp bawk. Mobile service hi zing dar 9 aṭanga chawhnu dar 1 thleng tihtawp a ni a, hei hi police-te thupek anga ti an nih thu service provider-te chuan an sawi a ni.  

Bengaluru, Karnataka-ah CAA leh NRC duh lohna lantira nawrh huaihawt zingah historian lar Ramachand Guha leh midang eng emaw zat man an ni a, mahse chawhnu lamah chhuah leh nghal an ni. Police-te chuan  khawpui chhunga punkhawm khapna thupek an tichhuak a, mahse hemi chung hian Town Hall ah nawrh hi an huaihawt lui tho a ni. Ramchandra Guha chuan boruak ṭha tak hnuaiah nawrh huaihawt turin mipuite chuan dikna an nei a ni tiin, police-ten hei pawh an phalsak lo chu democracy kalphung a nih loh thu a sawi.

Uttar Pradesh 

Uttar Pradesh-ah pawh nawrh huaihawt chhunzawm zel a ni a, nimin khan Lucknow-ah CAA leh NRC duh lohna lantirnaah buaina a chhuak leh. Nawrh huaihawtte hian bus  leh Khadra area-a Medeyganj police station an hal a, police-te an innawr buai leh a ni. State sorkarin state pumah punkhawmna khapna thupek tichhuak mah se, nimin khan eptu party Samajwadi Party MLA leh hruaitute chuan Vidhan Bhawan pawnah Citizenship Act duh lohna an lantir. 

Bihar-ah CAA leh NRC duh lohna lantirin left-wing party leh Jan Adhikar Party (JAP) chuan zing aṭangin bandh an huaihawt a, buaina liantham chhuak awm lo mah se rel service erawh a khaihlak nasa hle. 

Telangana-ah pawh Nampally ground-ah Left, SC, ST, BC leh minority pawl hrang hrang  huaihawtin CAA leh NRC duh lohna lantir a ni. Nawrh huaihawt zawm tura kal, University of Hyderabad zirlaite chu police-ten lo dangin an hreng zui a ni. 

Maharashtra  

Mumbai-a August Kranti Maidan-ah Congress, NCP leh party dang eng emaw zatin CAA leh NRC duh lohna an lantir.

Tamil Nadu 

Tamil Nadu-a NGO hrang hrangten nimin tlai dar 3 khan Valluvar Kottam ah Citizenship Act duh lohna lantirin nawrh an  huaihawt. Police-ten Alluvar Kottam-a CAA duh lohna lantira punkhawm tumte phalna an pek duh loh laiin, Tamil Nadu BJP leader H Raja chuan vawiinah he hmunah vek hian CAA thlawpna lantira mipuite pungkhawm turin a sawm ve thung. Hei hian eptu lam a tithinur hle a, ṭum hnih punkhawm an dilna hnawlsak an nih laia CAA thlawp lamin phalna an nei mai thei chu na takin an sawisel. 

Chandigarh, Punjab-ah pawh Sector 20 mosque pawnah dan siam thar duh lohna lantirin mi tam tak an pungkhawm a, an zingah hian zirlai eng emaw zat an tel. Nawrh huaihawtte hian Punjab Governor leh Chandigarh Administrator VP Singh Badnore hnenah CAA leh NRC an duh lohna thu memorandum an thehlut nghal bawk.