Rajiv Gandhi thahnaa thiam loh chantir Perarivalan-a ukil-ah inziak lut

India prime minister hlui, Rajiv Gandhi thahnaa tel vea puh leh thiam loh chantir, kum 31 zet lung ina tantir, A.G. Perarivalan chu Thawhṭanni khan Madras High Court-ah ukil (advocate) hna thawk thei turin a inziak lut. Perarivalan-a hi kum 2022 khan Supreme Court-in a lo chhuah tawh a, kum 54 mi niin, tunah hian Bar Council of Tamil Nadu and Puducherry-ah dan angin a inziak lut.

Perarivalan hi kum 1991-a kum 19 mi chauh a nih laiin man a ni a, Rajiv Gandhi thahnaa hman bomb siamna atana 9-volt battery pahnih supply-ah puh a ni. He thil thleng avang hian thi tura hremna (death sentence) pek a ni a, kum tam tak lung-in a tan hnuah hremna hi damchhung lung in tang tura thlak niin kum 2022 May khan Supreme Court chuan Article 142 hmangin a chhuah zalen a ni.

Lung-in a tan chhung hian lehkha zirin, Bengaluru-a Dr. B.R Ambedkar Law College aṭangin dan (law) lam degree a nei a, kum 2025 khan All-India Bar Examination a lo paltlang tawh a ni. Ukil hna a thlan chhan sawiin, Perarivalan-a chuan a thiam lohna lian tham awm loa kum tam tak lung-in a tan chhung khan dan (law) hriat pawimawhzia a hriat chhuah thu a sawi a, a tum ber chu lung-in hrang hranga dik lo taka thiam loh chantir leh hren mek ṭanpui a nih tur thu leh, criminal justice system leh jail reform lamah hma lak a tum thu a tarlang.