Ruihhlo tawlhtu Salim Dola Turkey aṭangin India-ah thawn

India rama ruihhlo tawlhluttu hmingthang leh Dawood Ibrahim-a ṭhuihhruai rinawm, Mohammad Salim Dola (59) chu Turkey aṭangin nimin khan India-ah rawn thawn a ni a, Narcotics Control Bureau (NCB) hnenah hlan nghal a ni. Kum 1966-a Byculla, Mumbai-a piang Salim Dola hi kum tam tak liamta aṭang tawh khan ruihlo tawlhnaah a lo inhnamhnawih tawh a ni.

Union home minister Amit Shah chuan hemi chungchang hi X-ah tarlangin, "Narco-syndicate lakah hian 'zero tolerance' kan kalpui a ni. Narcotics Bureau-in Salim Dola an man thei hi hmasawnna ropui tak a ni a, kan sorkar hian ruihhlo tawlh hmangte hi khawi hmunah pawh biru mah se, an himna hmun a awm lo tih a tarlang a ni," a ti.

Salim Dola lakah hian kum 2024 November khan Interpol Red Notice tihchhuah a ni a, United Arab Emirates (UAE) passport lem hmanga hming dang invuah chawpa a awm laiin, Indian intelligence agency-te hriattirna bawhzuiin Turkish enforcement agency-te chuan Istanbul-a Beylikdüzü hmunah an man a ni.An man hnu hian Delhi-a NCB headquarters-ah hruai nghal a ni a, court-ah hruai tura ruahman a ni.

Dola hi Maharashtra-a Sangli hmunah mephedrone (synthetic drug) kg 126 chuang siamchhuahna factory siamnaah inhnamhnawiha puh a ni a,ruihhlo an man hi Rs vbc 25.22 chuang man a tling.