State-te 'heat stroke' enkawlna leh kangmei chhuak venna tichak turin ngen

India ram hmun hrang hranga khua a lum chhoh zel avangin, sorkar laipui chuan state leh Union Territory tinte hnenah khaw lum lutukin a thlen, 'heat stroke' enkawlna bik tur 'management unit' hmanhmawh taka din turin a hriattir. India Meteorological Department (IMD) chuan ram chhung hmun hrang hrangah khaw lum nasa tak a awm chhunzawm dawn tih a sawi lawk avangin hriattirna hi tihchhuah a ni.

Union health secretary Punya Salila Srivastava chuan state sorkarte hnenah lehkha thawnin, hriattirna hi a vawi hnihna a nih thu a sawi a, March 9-a hriattirna hmasa zawk tihchhuah tawh bawhzuina tura hrilh nawnna a nih thu a tarlang. He ruahmanna hian thawktute inbuatsaihna leh mipui hnena 'heat wave' laka inven dan zirtirna te a huam tel a ni.

Health Ministry chuan damdawi-in tinah heat stroke avanga admit-te chhinchhiahna fel tak neih leh, ambulance service-te pawh inring renga dah turin a ti bawk. Hei bakah hian, nipui lai hian damdawi in leh hmun pawimawhah kangmei a chhuah palh loh nan 'fire safety' lam pawh uluk zawka enfiah turin thupek a chhuah tel bawk.

Kumin Fire Safety Week hi May 4 aṭanga 10 thleng hman a ni dawn a, a thupui atan "Safe School, Safe Hospital and Fire Safety Aware Society" tih hman a ni ang. IMD report-in a tarlan danin Odisha, West Bengal, Tamil Nadu, Andhra Pradesh, leh Gujarat-te chu nipui laia heat wave tuar na thei dinhmuna dingte an ni.